Rydyn ni wrth ein bodd ein bod ni wedi cael 3 gweld gwahanol gyffylog yn Fferm Denmark yn ddiweddar – pob un mewn rhan wahanol o’r warchodfa, felly efallai y bydd gennym ni sawl aderyn yma.
Mae’r cyffylog yn aderyn hirgoes cyfrinachol iawn ac yn bennaf yn crwydro’r nos sy’n treulio’r rhan fwyaf o’r dydd mewn cysgod trwchus – felly rydym yn ffodus iawn i’w gweld. Os ydych chi allan yn cerdded ac yn tarfu ar un yn anfwriadol o’i le gorffwys, bydd yn sigsagio rhwng y coed cyn cwympo’n ôl i’r cysgod.
Cyffylog gyda mwydyn daear
Mae’r lleiniau cysgodi a’r ardaloedd prysgwydd o amgylch y porfeydd yma yn Fferm Denmarc yn fannau gorffwys da i’r cyffylog yn ystod y dydd, gyda’n porfeydd sy’n llawn infertebratau yn darparu bwydo rhagorol yn y nos.
Adar preswyl yw’r adar sy’n bridio yn y DU ond, ddiwedd yr hydref, mae adar yn dod yma o’r Ffindir a Rwsia i dreulio’r gaeaf. Yn anffodus, ychydig iawn o gyffylogod sy’n bridio sy’n weddill yng Nghymru – mae colli coedlan a reolir ym Mhrydain yn ystod y 50 mlynedd diwethaf yn ôl pob tebyg wedi cyfrannu at y dirywiad ym mhoblogaeth bridio Prydain.
Mae nifer o adar o’r DU wedi cael eu tagio â lloeren a’u dilyn ar y daith hir i’w mannau bridio. Darganfuwyd bod un aderyn o Gernyw wedi hedfan 6200 km (bron i 4000 milltir) i Rwsia, gan gyrraedd yr un lledred â Gorllewin Mongolia! (ffynhonnell: http://midwalesringers.blogspot.co.uk ).
Cadwch lygad allan wrth i chi gerdded o amgylch ein llwybrau ac efallai y byddwch chi’n ddigon ffodus i weld un. Mae ein llwybrau ar agor bob dydd ac eithrio Dydd Nadolig (dewch â’ch welingtons – mae rhai llwybrau’n fwdlyd ac yn wlyb iawn ar hyn o bryd); delfrydol ar gyfer taith gerdded gaeafol iachusol cyn y rownd nesaf o fins peis!
Os hoffech ddysgu mwy am adar, beth am gofrestru ar gyfer ein cwrs ‘Adnabod Adar’ o 13 Ebrill tan 15 Ebrill 2013 (10 am i 5 pm), gyda’r tiwtor Dave Anning (RSPB). Cliciwch yma am ragor o wybodaeth.
