Rydym wedi treulio’r wythnosau diwethaf yn aros yn eiddgar am do ‘gwyrdd’ ar gyfer ein llety gwyliau eco hunanarlwyo newydd. Yn anffodus mae’r tywydd wedi cael y llaw uchaf unwaith eto, gan ohirio’r cam pwysig hwn o’r adeiladu dros dro.
Fodd bynnag, cyrhaeddwyd carreg filltir gyffrous a phwysig arall yr wythnos hon gyda chomisiynu ein system wresogi boeler biomas newydd. Bydd hyn yn cynyddu ein cynaliadwyedd i’r eithaf, gan ddefnyddio tanwydd pelenni pren o ffynonellau lleol i gynhyrchu gwres ar gyfer y llety gwyliau newydd, yn ogystal â gwasanaethu holl swyddfeydd ac adeiladau presennol Fferm Denmark.
Mae’r cwmni Biofutures o Abertawe wedi gosod a chomisiynu’r system. Dywed Kedrick Davies o Biofutures: “Bydd y boeleri biomas yn cynhyrchu llosgiad hynod effeithlon ac, os defnyddir pelenni pren o ansawdd da, nid oes unrhyw fwg gweladwy unwaith y bydd y boeleri wedi cyrraedd y tymheredd cywir. Hefyd, mae defnyddio pelenni o’i gymharu â rhedeg ar olew neu LPG yn golygu gostyngiad sylweddol mewn allbynnau carbon.”
Rydym hefyd yn gymwys ar gyfer y Cymhelliant Gwres Adnewyddadwy (RHI) sy’n golygu bod ein gwresogi biomas nid yn unig yn gwneud synnwyr yn amgylcheddol ond hefyd yn ariannol. Yn ogystal, mae ein trydan yn cael ei gynhyrchu gan Solar PV sy’n rhoi digon o ‘bŵer gwyrdd’ inni ar gyfer dyfodol mwy cynaliadwy.
Nawr bod gennym ni wres a phŵer, cadwch lygad ar y gofod hwn am newyddion am ein to sedwm a’r cyffyrddiadau gorffen ar gyfer yr adeilad newydd – wedi’i drefnu ar gyfer 20 Rhagfyr 2012 o hyd!. Yna bydd ein Llety Gwyliau Eco yn barod i groesawu gwesteion o’r Pasg 2013.
