Dyfrliwiau Gwyllt

Mae Dyfrliwiau Gwyllt yn weithdy i ddechreuwyr pur a’r rhai sydd â diddordeb mewn peintio i dreulio diwrnod yn dysgu sut i weithio gyda dyfrliwiau, wedi’u hysbrydoli gan dirweddau prydferth Fferm Denmarc.

Treuliwch amser dan arweiniad yn edrych yn fanwl ar yr amgylchedd, mwsoglau, cen, planhigion a golygfeydd ehangach y dirwedd. Trwy frasluniau cyflym yn yr awyr agored a chasglu samplau bach, bydd syniadau am liw, siâp a ffurfiau yn cael eu dwyn yn ôl, a’u defnyddio fel ysbrydoliaeth.

Mae dyfrliwiau yn gyfrwng sy’n caniatáu ar gyfer manylion cywrain fel y gwelir mewn astudiaethau botanegol a pheintio bywiog, mynegiannol ac ymatebol.

Ar ôl bore o fraslunio mynegiannol, gwneud astudiaethau bach a dysgu am gymysgu lliwiau, gwneud marciau a brwsys, byddwch yn treulio’r prynhawn yn ymlacio wrth greu paentiad mwy o faint wedi’i ysbrydoli gan eich brasluniau a’r dirwedd.

Mae’r gweithdy hwn ar gyfer unrhyw un sydd wedi eisiau gweithio gyda dyfrliwiau ond heb gael y cyfle i dreulio amser yn dod i’w hadnabod, a gyda chyfarwyddyd tiwtor profiadol, darganfod amlbwrpasedd y cyfrwng. Croeso i bob gallu ac nid oes angen profiad blaenorol.

Mae’r gweithdy hwn yn ymwneud â threulio amser yn edrych, gweld y dirwedd yn agos a threulio amser yn arsylwi ac yn ymateb i’n hamgylchedd. Mae peintio yn ffordd wych o ddatblygu cysylltiad dyfnach â’r byd o’ch cwmpas, ac mae dyfrliwiau yn gyfrwng mynegiannol ac amlbwrpas sy’n eich galluogi i archwilio syniadau a lliw mewn ffordd sy’n ymlaciol, heb bwysau ac yn fyfyriol.

Eich tiwtor ar gyfer y cwrs hwn yw Chisara Vidale.

Wedi’i lleoli yng Ngheredigion, Cymru, mae Chisara yn artist gweledol ac yn hwylusydd y mae ei gwaith yn archwilio themâu sy’n ymwneud â pherthynas rhyngrywogaethol, queer-deb, hybridedd ac ecoleg. Er bod ei hymarfer yn canolbwyntio ar beintio mewn dyfrliwiau, mae hi’n gweithio’n aml ar draws tecstiliau a gosodiadau cerflunol. Mae Vidale wedi arddangos gwaith mewn sioeau grŵp ac arddangosfeydd unigol ac wedi gweithio mewn cydweithrediad â chasgliadau artistiaid a brandiau cynaliadwy. Fel hwylusydd mae hi wedi arwain gweithdai a chyrsiau i oedolion a phobl ifanc, mewn lleoliadau fel Arbeit Studios Llundain, Createspace Cymru ac Eco Hub Aber, yn ogystal ag mewn digwyddiadau cymunedol fel Art in the Park.
www.chisaravidale.com